 |
| ilustrasi |
Karya: Andi Saputra
NIBAK malam
nyan, seumeuloh buleun peudoda seulanga
keumang. Angen nyang teuka pih jipot meusap-sap peulepie alam donya. Awan
meubanja sang meu-ukee di langet manyang. Dum siwah lam blang surak meubura.
Bit meunan,
Cupo Fatimah kalagei gaseng meuputa-puta, ban seulayang nyang putoh talo.
Geuduk han teunang, geudong han teunang. Cukop that geusayang boh simalakama. Pikeran
meulayang pikee aneuknda. Aneuknda ka rayeuk ka le nyang seunang. Ka troh janji
pinang, ranup ka jineuk ba. Kulet jih haloh ban kuneeng langsat. Seulanggoi
meuikat ok patah manyang. Keunuw boh manok, katok keuraw’eut. Cukop meusan’eut
keu aso syuruga.
Bak geudong-dong nyan, Cut Fatimah teusereh hate geuh lom keu janji ngoen
bino Peutua Kade nyang geutanyeng, “Uro nyo adak kalon boeh male, adak pih
geumade, haroh lon tanyeng, pu bungong di rumoh droeneuh kana nyang tanda?”
Geuseuot wate nyan, “Bungong i rumoh
timoh lam abe, kon i keude dalam rak kaca. Teungoh lon siram lon jok bak guree,
bek but meutiree meu rumoh tangga.”
Asai geuingat keu janji nyang karap troh wate nyan, hate geuh sabe sosah.
Tapi adak meunan, sosah hate nyan sabe geusom bak Dara Phonna. Ngoen grak nyang
leumoh, Cupo Fatimah geulangkah u abah rot. “Huft,” Cupo Fatimah meusadea bak neurok
abah rot sira geupeulheuh naphah panyang. Seun-seun bacut ulee geucepet, mata
geuh teupet peurasa mangat. Jioh teupike, luwah meubayang. Sang-sang hate
beukah, teuplah lam dada. Lam rasa meh-moh ie mata hile. Han trok pikee bak
mita cara. Allahu rabbi nyang maha ade,
neubuka hate dum manusia. Kasep cuba nyo ateuh nyang jahe, bek le boh hate dalam
sengsara, Cupo Fatimah geumeulakei lam hate nibak Allah.
Lheuh geusampoh ie mata ngon ujong jilbab, “Thap,” Cupo Fatimah
geupeuhudep lampu sente geulhoh u babah jurong. Hana meusidroe pih lom na
urueng nyang lewat. Lampu sente geulhoh man silingka rumoh. Sige-ge geugusuek
le dada. Aleh pakon, getthat meudub-dub jantong geuh. Yoh seupot uro kon hate
geuh ka hana mangat. Macam dum teuingat geuh. Sang-sang lagei na ureung leum
geuh keuh, atawa sige-sige lagei-lagei na nyang keuneuk cuw manok geuh lah,
pokok jih meujampu lawok pikeran geuh. Watei jipot angen, bulee kudok geuh
rhui. Hate geuh pih maken teumakot.
Cahya buleun trang peuleumah bayang
lagei na urueng jak dari jioh. Karna syek geuh, “Thap,” geulhoh ngoen sente.
“Idara droeku ka jiwo beut. He. He,” Cupo Fatimah teusenyom rumeeh. Nyang gura,
aneuk dara geuh nyan, Dara Phonna, meuhie leumoh that. Grak langkah jih cukop
bacut. Sang seb treb ka bak geupreh, hana cit troh-troh u abah rot. Meugedhum
lam jantong teuingat keu naseb droe geuh yoh awai. Cupo Fatimah laju geuplung. Watei
Geukalon Dara Phonna teungoh meusok-meusok teujoh ie mata, laju geu-um sigra. Geugusuk
bak rhung ngoen geucom, teuma geupapah sampo troh u rumoh.
“Pakon gata kliek beuno, Aneuk?”
“Hana hai Poma. Bang Din beuno
geupeuyo long bak abah jurong. Geumeusu lage su burong. Man ken ye ku ilong,”
Seuot Dara Phonna.
Lam leupie malam, dua droe urueng,
Poma ngoen Aneuk geuh nyan teunget lam rahsia. Poma syek keu aneuk. Aneuk Syek
ke Poma. Syek keuna rahsia nyang teusom antara urueng nyan dua.
***
Singoh beungoh jih, Dara Phonna
teuduk tahe-gante di dalam kama. Ka hana
meuh, beuna keuh pinto. Beubagah troh judo geulanto ayahnda. Bak tahe-tahe nyan,
brop rho ie mata. Poma nyang neuk tren u dapu rhoh neukalon, “Pakon tahe that,
Neuk?”
“Oh. Hana Poma hai. Rhoh broh lam
mata,” seuot Dara Phonna pura-pura upiy mata.
Cupo Fatimah peurap le bak Dara Phonna, sira geugusuk, geukheun, “Peugah,
Neuk, bak so laen teuma taneuk peugah hai meunyo kon bak Poma nyang na sidroe teuk
nyo sajan gata.”
“Han sanggop lon theun le Poma e. Hantom lon peugah takot droeneuh seudeh
hate. Weuh that-that lon watee ji ceuket ayah le gob laen. Beuklam lon dawa
Bang Din wate geupeukaru lon. Geukheun, ka peugah bak-bak Yah keuh beh. Seudeh
that lon tuan Poma e. Ayah geujak geutinggai lon sejak lam kandong. Heu. Heu,”
Dara Phonna nyang meusok-meusok laju lam leumung Poma.
“Ta saba, Aneuk. Ta saba.”
***
Uroe keu si uro janji maken to wate. Keuneuk ijak lake, anuek dara keu
judo. Lheuh seumbahyang leuho uro nyan, tiba-tiba Cupo Fatimah teuka sijuk
seu-um. Teuboh geuh meugok-gok sang-sang meu-ayon donya. Si uro ka troh
siminggu, ubat sigala ubat, rajah sigala rajah kalheuh meu ujo, tapih that rugo
han jeut keu peunawa.
Beudoh Dara Phonna hape abuwa Raman brithei kheun teungku mungken
meuseubab kaoy Nek. Malam nyan, abuwa Raman pih teuka.
“Abang e, saket that-that lam ule. Dada sang beukah, teuplah lam jantong
hate. Heu. Heu,” Cupo Fatimah meusok-meusok geukliek geu-adu droe seureuta
geukisah troh janji preh ranub bak abang geuh nyan.
Lheuh geupeuteunang Cupo Fatimah, abuwa Raman geupakat duk Dara Phonna i
dapu.
“Uro keu uro, sira jirabe leumo, mak keuh sabe ji rayu le ayah keuh nyang
wate nyan teungoh peuget jalan perusahaan kafe. Bak si uro, mak keuh ji peulaku
bak teungoh blang. Karena ayah keuh rame rakan teuntra ngoen pulisi bak
perusahaan, kamo terpaksa teurimong kheun awak nyan. Hana pat mita keadilan yoh
masa nyan. Dua buluen phon, ayah keuh sabe na jiwo saweu mak keuh karna galom
mumee. Bak buleun keu lhei, mak keuh mumee. Lheuh nyan kruh ijak, hantom iwo
le. Rupa jih, ayah keuh dendam karna na kamo poh yoh phon ipeudrop. Adak meunan
singeh uro ta cuba jak cit ta lake jih beu jitem ke wali nikah droekeuh.” Han
sanggop pike keu naseb Poma, Dara Phonna meudrob-drob rho ie mata.
Singoh uro jih, Dara Phonna geuba jak meureumpok ngen ayah di rumoh
mabit, adek ayah. Kheun ayah lheuh geudeungo lakei dari Dara Phonna, “Kah bijeh
iluwa nikah. Na meuphom?” Sengkak dada sang-sang sesak hana meuoh peugah ban.
Su ayah sang geulanteu teungoh cot uro timang.
Sira wo, Dara Phonna teukliek dikee abuwa Raman, “Ureueng kanto geupeugah
lon aneuk ayah karna ayah ngoen mak na buku nikah KUA. Ayah geupeugah kon. Ho
lon jak lom, abuwa? Paki keuh meunyo troh su ayah nyo bak punyung mak? Kiban ta
peugah bak keluarga Peutua Kade? Abuwa, neuseumate keudeh ulon nyang aneuk
hareum nyo, bah bek na le aneuk hareum lheuh nyo. Heu. Heu.”
Abuwa raman meukhap seungap lagei teupeulon panyet. Ie mata sagai nyang
hile, sira geugusuk geukheun, “Ta saba aneuk meutuwah. Ta saba, Neuk.”
Penulis adalah Pengurus Forum Lingkar Pena (FLP) Lhoksukon
.jpg)
EmoticonEmoticon